Գլխավոր էջ | Նորություններ և իրադարձություններ | ԱՆԻՖ-ի և «Ապագա Փրոջեքթս» ընկերության համատեղ ծրագրի իրականացման աշխատանքները մոտենում են ավարտին

ԱՆԻՖ-ի և «Ապագա Փրոջեքթս» ընկերության համատեղ ծրագրի իրականացման աշխատանքները մոտենում են ավարտին

Հայաստանի պետական հետաքրքրությունների ֆոնդի` ԱՆԻֆ-ի և «Ապագա Փրոջեքթս» ընկերության համատեղ ներդրումային ծրագրի շրջանակներում արդեն շահագործման է հանձնվել  հյուրանոցային նոր համալիրը, իսկ Յելլ Էքստրիմ Պարկի և Ապագա Ռեզորթի տարածքում շինարարական աշխատանքները մոտենում են ավարտին, և բոլոր նոր ծառայությունները հանրությանը հասանելի կլինեն շուտով։

Նշենք, որ ԱՆԻՖ-ի դուստր «Ձեռնարկատեր+պետություն ներդրումների կառավարիչ» ՓԲԸ-ն 1,6 մլն ԱՄՆ դոլարին համարժեք բաժնեմասային  ներդրում է իրականացրել «Ապագա Փրոջեքթս» ՓԲԸ-ում։

Ըստ «Ապագա Փրոջեքթս» ընկերության տնօրեն Տիգրան Չիբուխչյանի. «Սա պետական և մասնավոր ոլորտի միջև արդյունավետ համագործակցության օրինակ է, որը, բիզնես տեսլականին զուգահեռ, ունի սոցիալական մեծ նշանակություն. այն ուղղված է գյուղական համայնքի զարգացմանը և համայնքային կյանքի բարելավմանը։ Մեր բոլոր նախաձեռնություններն աչքի են ընկել խիզախությամբ և նորարարությամբ։ Այդպես էլ շարունակելու ենք»:

ԱՆԻՖ-ի դուստր` «Ձեռնարկատեր+պետություն» ֆոնդի տնօրեն Բելլա Մանուկյանի խոսքով պետական միջոցների ներդրման ամենաարդյունավետ ձևերից մեկը հաջողված և շահութաբեր բիզնես ծրագրերում ներդրումներ անելն է։ «Վստահ ենք, որ «Ապագա Փրոջեքս»-ում մեր ներդրումները ոչ միայն նպաստելու են այս արդեն կայացած բրենդի զարգացմանը, ոչ միայն ստեղծելու են նոր աշխատատեղեր, այլև  զգալի դեր են ունենալու ավելի գլոբալ թիրախների՝ տուրիզմի ոլորտի արդիականացման և զարգացման ուղղությամբ։ Հենց նման ծրագրերի խթանումն է ֆոնդի նպատակներից մեկը»։

«Ապագա Փրոջեքթս» ընկերությունը համակարգում է երկու ծրագիր Տավուշի մարզի Ենոքավան համայնքում՝ «Ապագա ռեզորթ» հյուրանոցային համալիրը և «Յելլ Էքստրիմ Փարք» զվարճությունների այգին։ Ընկերության երկու ծրագրերը գյուղական համայնքներում տուրիստական ենթակառուցվածքների զարգացման և տնտեսական նոր հնարավորությունների ստեղծման հաջող օրինակ են։

«ԱՆԻՖ»-ի և «Ապագա Փրոջեքթս»-ի միջև համագործակցությունն ուղղվել է «Յելլ Էքստրիմ Փարք»-ի նոր՝ մոտ 2,5 կմ երկարությամբ զիփլայնի կառուցմանը և սպորտային զվարճության նոր հարթակի ներդրմանը, ինչպես նաև «Ապագա Ռեզորթ» հյուրանոցային համալիրի ենթակառուցվածքների, այդ թվում՝ նոր խոհանոցի զարգացմանը և համարային ֆոնդի ավելացմանը։ Ծրագրի իրականացման արդյունքում Յելլը կկարողանա ավելացնել թողունակությունը և գրեթե կկրկնապատկի ընձեռնված կայուն աշխատատեղերի քանակը։

Հիշեցնենք, որ ԱՆԻՖ-ի «Ձեռնարկատեր+պետություն ներդրումների կառավարիչ» ընկերության ներդրումային ֆոնդի գործունեության նպատակը տնտեսության մեջ մասնավոր կապիտալի ներհոսքի խթանումն է և դրա միջոցով տեղական բիզնեսի զարգացման խթանումը։ Ֆոնդը ներդրումներ է իրականացնում տեղական ընկերություններում՝ նպաստելով հայաստանյան ձեռնարկությունների զարգացմանն ու ընդլայնմանը: Ֆոնդի կողմից ֆինանսավորման ենթակա են Հայաստանի Հանրապետությունում գրանցված ինչպես նոր, այնպես էլ արդեն իսկ գործող բիզնես ծրագրերը, որոնք համապատասխանում են ֆոնդի չափանիշներին: Ֆոնդի մասնակցությունը 25% – 49%  է, մասնակցության չափը մեկ ծրագրում՝ 0.5 – 4մլն ԱՄՆ դոլարին համարժեք դրամ:

Նմանատիպ նյութեր

«Ֆլայ Արնա»-ն մեկնարկում...

Հայաստանի պետական հետաքրքրությունների ֆոնդը (ԱՆԻՖ) ուրախ...

Ֆլայ Արնան ստացել է...

  Նոր ավիաընկերության գործունեության մեկնարկին...

Ֆլայ Արնան ստացել է...

Հայաստանի Հանրապետություն, Երևան, 3, հունիս, 2022թ.։...